Exodus 11

1Katau en marmari tounah keil ekek, Iahova viteni min Mosis vit, “Nisan mahien hetas sesuk heha min asuv houlu ten out Isip ka meatin keil onen. Evus, kei hemaen kami miheha. Anatin, hekeih esuk keke kami miheha hetal min tounah vasi keil onami. 2Helamu, kihiteni min me-Isrel keil keke keil vasi ihis me-Isip keil koa aro vesesal ven keil keke isani min keil mormore tounah keil koa amumoni en gol ka silva.” 3Ka Iahova sakin me-Isip keil avouhou min keil esuk. Ka Mosis emun mai vi mari meatin tai en meten hetetamen keil onen asuv houlu ka meatin vasi keil ten out Isip.

4Mosis va ris ven asuv houlu ten out Isip ka viteni mini vit, “Koanik vi selusien onen Iahova, 'En metavinavong, nika vasi atan ten out Isip, 5ka nisakin moeite vasi keil ten out Isip koa avi meahos imatmat: koan hekur vulin asuv houlu hekatau, hehita hevus en moeite onen ahin keil toumien koa amul asak mesen anien. Ka en tirendan keil emun, moeite one imatmat. 6Tangien heka vasi out Isip. Hetisa mok helin asa koa kur out en avong telamu, vuo asa koa hekur out en avong keil koa hemai. 7Ka en out onen me-Isrel keil, tangien hetovuol, out hetaeng. Huli keil emun irmis kattei meatin vuo tirendan. Hemukonek, miheilea keke inau, Iahova, nalei kan me-Isrel keil ateisav ran me-Isip keil.'”

Navong Mosis mul selus, tin kati ka viteni mun mini vit, “En avong koanek, hetetamen keil onom imai, iha netan minau. Keil ipeah nau keke malah lat meatin keil onak iha ran keil. Hevus, niha suk.” Navong selus evus, Mosis mea ran asuv houlu enek.

8

Copyright information for PMA